https://www.youtube.com/watch?v=Abaz_BYlqmk&t=12s
Yurntumu kuurlurla karnalu yirrarni ‘Learning in Country’ LinC kuja-piya karnalu yirdi-mani. Jarlu-paturlu-nganpa wangkaja nyarrpa kuja karnaluu ngurrju-mani LinC yungulu kurdu-kurdu kuurlu-wardingki pirrjirdi nyina Warlpiri jaruku manu kapili Warlpiri wangkami pirrjirdi-nyayirni. Kanyi karnalu-jana Yurntumu-ngurlu wirlinyi, kurdu-kurdu yungulu pina-jarrimi yupujurla jarlu-patu manu murturna-patu-kurlu.
LinC-rla wirlinyiki ngarnti, tija-patu, yapa manu kardiya kalu wangkami, nyarrpara-wana yungulu yani wirlinyi nyampu theme-ki, kurdu-kurduku, pina-maninjaku Indigenous Language and Culture Curriculum karnalu nyanyi plani-maninja-kurra. Pirrjirdi-mani kalu-jana kurdu-kurdu. Milya-pinyi kalu nyanungu-nyangu nguru warlalja manu nyarrpara-wardingki warringiyi-kurlangu manu nyanungu-nyangu Jukurrpa.
LinC-kurlangu jarlu-patu Warlpiri warrkirni-patu kuja kalu-nganpa mardarni manu Warlpirirli pina-pina-maninjaku kuja kalu ngampurrpa nyinami. Kurdu-kurdu yungulu pina-jarrimi warlalja-patu-wana, nyarrpa kuja kalu Warlpirirli pirrjirdi wangkami manu yirrarni manu nyarrpangku kuja kalu nyiya-kanti-kanti ngurrju-mani. Yungulu kurdu-kurdu pirrjirdi pina-jarrimi ngurrarangka manu class ruumu-rla yungulu pina-nyayirni nyinami kuurlurla.
Yurntumu Kuurlurla
Yulkanjaku
Yulkanjaku– Nganimpa karnalu-nyanu yulkami jarnku-jarnku manu nguru-ku. Warrki-jarrimi karnalu nurna-nyayirni jintangka, yardajirri karnalu-nyanu wangkami panu-juku.
Pukurl-Pukurlpa
Pukurl-Pukurlpa– Nganimpa ngulaju wardinyi nyayirni karnalu nyinami nganimpa-nyangu warlalja-patu-ku, manu yapa-patu-ku manu nguruku. Ngula karnalu-nyanu mardarni kuruwarri Warlpiri-kirlangu, manu tarnnga karnalu pina-pina-jarrimi. Nganimpa wardinyi nyayirni ngana nganimpaju.
Jintangka
Jintangka – Jukurrpa karlipa mardarni panu-jarlu nyiya-kanti-kanti-rla jinta-warlayi-rla yapa, nguru, kuyu, miyi, ngapa, watiya, marna manu pirli. Jintangka karlipa nyinami manu mardarni manu karlipa-nyanu yardajirri-mani kuja karlipa-nyanu mardarni ngurnku-palu manu rduku-rdukurlu. Nyinami karnalu nguru warlalja ngula karnalu mardarni palkangka.
Nyiya kuja karlipa ngampurrpa nyina ngarlipa-nyangu kuurlu-ku manu kurdu kurdu-ku
LinC-kurlangu warrki ngulaju Yurntumu kuurlu-wardingki kurdu-kurdu-ku-mipa yungurlu tarnnga Warlpiri yimi manu kuruwarri pina-jarrimi Warlpiri-patu jarlu-patu-jangka manu Warlpiri-patu-kurlangu nguru-jangka manu kuja-ka ngunami ngurrara-wana kuja kalu pina-yanirni kuurlu-kurra, ngulalu pina-jarrija yupujurla kapirli pina-wangkami Australian Curriculum warrki-karirla.
